قالوا بحر قلت البحر وش ابيبه

قالوا بحر قلت البحر ويش ابيبه ..
بيني وبينه ماحصل ولف وإعجاب ..
ولكل مشعافٍ هواه وحبيبه ..
وأنا هوى بالي على مر الأحقاب ..
ودوا الخفوق ومبتغاه وطبيبه ..
يابوفهيد اليا رغا شامخ الناب ..
في مرتعٍ نوقه رعاها شبيبه ..
يتلون شيخٍ للجمالات كساب ..
ابله مزايينٍ وقاعه عشيبة ..
تفكر بخلق الولي رب الأرباب ..
لبيه ياشوف الفجوج الرحيبة ..
مد النظر مادونك جدار وأبواب ..
قال المغدّى والمعشّى قريبه ..
يومه وسيع الطان والجو خلاّب ..
والصبح من ليله خذاها نهيبه ..
وأذن حداهم دون مسجد ومحراب ..
وأصبح صباح الخير مافيه ريبه ..
والشمس من كبد المراويح تنساب ..
زهابهم من فوق مورٍ قنيبه ..
قنيب ذيبٍ جاوب لصوته ذياب ..
ياما اعتلى الهضبه وحدّر شعيبه ..
ثم لشّه البيطار ذا غاية اعجاب ..
شيخٍ يشالي للظفر فوق جيبه ..
سمح المحيا ماعقد عين وحجاب ..
شيخ يوقف عنده العلم هيبة ..
لبيه ياسعد وفخر عصم الأشناب ..
وعصير فايت يامدوّر ذهيبه ..
عان المسودس قصر بكريب وأطناب ..
وجمر السمر يعجبك صالي لهيبة ..
ياحيّ جمر السمر من بدّ الأحطاب ..
وبنّ اليمن يزهى دلالٍ عجيبة ..
والنجر لعيون المناعير لعّاب ..
وبهارها من كلّ عودٍ يجيبه ..
والزعفران اليا صبغ كنّه خضاب ..
ماها قراح ماتغثبر قليبه ..
لها حذيق يعتبيها وصبّاب ..
وقمراً تضوّي والهروج اللبيبة ..
وسوالفٍ ماهازها زيف وكذاب ..
نوادرٍ كلّ يماري بطيبة ..
ثمن الكلام اللي كما طبّ الأطباب ..
وفقارةٍ تطبخ بصافي حليبه ..
مرشوشها سمنٍ رعت ظانه أعراب ..
ألذّ من يانع جناه وزبيبه ..
وبراد جمري واسر ياليل الأحباب ..
البر سلوه لو دفعنا ضريبه ..
ماهي خسارة تنبسط والكدر غاب ..
واخوان شمّا تشتري باللي هي به ..
وش عاد لو علّه من الغيث سكّاب ..
من فيض من لاتعلم الناس غيبه ..
وفاحت عشوبه يابعد كل الأطياب ..
هذا الغرام ان تمّ لك ياحبيبه ..
كنّك ملكت الأرض في صفحة كتاب ..
يسرح خيالي وأم سالم تجيبه ..
طربانةٍ والشعر من شوقها ذاب ..
يسعد صباحه والقيال ومغيبه ..
لاهيّفت شمسه للألباب سلاّب ..
هذا غرامي والبحر ويش أبي به ..
وكلّ على ليلاه له ولف وإعجاب ..