(ناصر):

(ناصر): ..
سلام و المركب عليـه اثنيـن و الساعـه تـدور ..
و الموج هادي و الوعد قـدام و الرحلـه ذهـاب ..
أن غابوا الأجواد ما غابوا من أقفـاص الصـدور ..
دق الجرس و العلم عجل به بعـد طـول الغيـاب ..
(خالد): ..
يا مرحبا يا صاحبي وأعبـر بنـا سبـع البحـور ..
علّي أديـر البوصلـه و أنـت الله الله فالزهـاب ..
أنـا سمعـت أنـك تحديـت الذيابـه و النمـور ..
و العام لك قلب خضر و اليوم مـا كنـك شبـاب ..
(ناصر): ..
الوقت قاسي و الفتى يبقى علـى الشـده صبـور ..
و أن ما غدا الرجال ذيب يطيـح بأنيـاب الذيـاب ..
حتى الصديق الله وكيلك صـار دمـه مـا يفـور ..
و أنا لقيت الأصدقاء معظمهـم أشبـه بالسـراب ..
(خالد): ..
لا تأمـن الدنيـا و لكـن لا يجـي قلبـك فتـور ..
أحد يشوف أحلى البنات و لا يجـي فيـه انجـذاب ..
ما للحباري في القنص يا كـود هـدّات الصقـور ..
و أن ما كفخ طير الفضا معناته أن الراس شـاب ..
(ناصر): ..
كلش و لا قطع الرجا في الطيبـات مـن العطـور ..
لكن علـى شـرع الله و سنـه نبيـه و الكتـاب ..
بيض العذارى عسجديات الجسد ضمـر الخصـور ..
سود العيون مجـدلات الـروس تلعـات الرقـاب ..
(خالد): ..
بالله قلي مـا بـرى جرحـك بعـد بـدر البـدور ..
ما عوضوك الفاتنـات الذاهبـه و الجـرح طـاب ..
كم واحـد لـو مرتـه مزيونـه بعمـر الزهـور ..
ضاعت علومه و الصواب الله يجيبـك يالصـواب ..
(ناصر): ..
أحد على الدنيا وهو كنـه مـن أصحـاب القبـور ..
و احد يجي و يروح مع خله وهو تحـت التـراب ..
ياللي نسيت أن الهوى يبقى علـى مـر العصـور ..
بنشدك عن برقٍ سرابك و أنت من فوق السحـاب ..
(خالد): ..
معلّمـك يـا صاحبـي بالسالفـه و العلـم نـور ..
وش بك تقول الشمع ذاب الشمع مـا يمديـه ذاب ..
و البارق اللي مرني و أنا أدعـي بقلـب شكـور ..
هذاك خير طاح بأرض الغيـر و الـرب أستجـاب ..
(ناصر): ..
وش بينك و بين المدينه و الشـوارع و القصـور ..
ما قد شبعت من الخلا الخالي و من روس الهضاب ..
الناس ما تبطي ولـو راحـت مراويـح الطيـور ..
ترمي تعبها في البيوت و تستريـح مـن العـذاب ..
(خالد): ..
البر يشرح كل صـدر و يقلـب الضيقـه سـرور ..
و أنا إلى جيته يمر الوقت ما أحسب لـه حسـاب ..
يا ما حلا طوي الخبوت و سجه الخاطـر شهـور ..
ولا معك غير النشامـي اللـي يعـزون الجنـاب