هبت الذكرى بصدري وبيحت الكنين

هبت الذكرى بصدري وبيّحت الكنين ..
والمشاعر حاوطتني مع كل الجهات ..

تهت في غبة بحر طاري الحب الدفين ..
بين مر الواقع وبين لذة الأمنيات ..

وانت يا اللي منزلك بين رمش وبين عين ..
كل ما تطري علي اسأل الله الثبات ..

لك مكانٍ لو تدور الليالي والسنين ..
ما تزعزع لو تزعزع جبالٍ راسيات ..

يا ندى ورد الربيع ورحيق الياسمين ..
يا شذا عطر الرياحين يا عذب الصفات ..

اتمنى بعض الاحيان لو مثلك ثنين ..
يضربون اروع مثل في شموخ المترفات ..

لاجل احبك يا بديع الوصايف مرتين ..
جعلني ما اذوق حزنك على طول الحياة ..

ما توفيك القصايد لو اكتب كل حين ..
ولو اببدع لك من الجزل سبع معلقات ..

ارسمي البسمه على ارق واجمل وجنتين ..
روحي تراعيك قبل العيون الساهرات ..

ما درينا وش يخبي الزمن للعاشقين ..
اجمعي يا مترفه ما تبقا من شتات ..

غيبتك طالت وطيفك معي في كل حين ..
علم اللي يحسب ان كل شيءٍ فات مات ..

ما درا بالدمع .. والذكريات .. وبالونين ..
ولا درا ان ضيم المفارق يسوي هالسوات ..

لين صرت اشوف حلمي ما بين الفرقدين
واتذكر ما مضى من جروح وتضحيات

----

لو ما صارحتك بصارحك امام العالمين ..
بصدى صوتّ يصل لين دجله والفرات ..

ومهما قررتي طلبتك طلب لا تبعدين ..
لاجل عينّ عقب غيبتك لا يمكن تبات ..