تدور الأرض وتدور السوالف والسنين تدور ..
وأنا لو اعرف اللي راح مانيب اعرف الباقي ..
يقولون القصيد شعور والشاعر بدون شعور ..
وأقول الله يعاقبني اذا ماهو من اعماقي ..
انا لو اكذب بشعري وقف نبض ويبس حنجور ..
وقادر اخسر الدنيا وعاجز اخسر اخلاقي ..
ولأجل عنق المها والصوت الأدفى والعيون الحور ..
وقف عمري ولا ادري ويش انا من وقفته لاقي ..
قسم بالله! ما قبلك غياب ولا بعدك حضور ..
ولكن ودي بفرقاك لو ما ودك فراقي ..
تعاتبنا بما فيه الكفايه من ثمان شهور ..
وسالت دمعتين وطاح قلب وماتت أشواقي ..
تعدتك المشاريه وجفاك اللوم والمستور ..
اذا ما يكشفه صوتي كشفه الحبر بأوراقي ..
تعبت اضحك على نفسي وأبرر لك وأعيش الدور ..
وتعبت اجامل ظروفك وأصدق كذبك الراقي ..
يكفيني اغيب وخافقي ماجاك منه قصور ..
ويكفيك اتذكر كل ليلة لهفة عناقي ..
تذكر يوم اخليك اتباهى كبرياء وغرور ..
يوم اني اتحدى بك وأخيب هقوة الهاقي ..
وتذكر يوم اعذرك وانت لا صادق ولا معذور ..
أدورلك عذر وأصدقه وأكذب احداقي ..
وتذكر يوم جيت من الحزن متضايق ومكسور ..
فرشت لك الضلوع وقلت لك يا سيد عشاقي ..
خذ ضلوعي وابن فيها يسار الصدر بيت وسور ..
ترى مافيه قبلك من سكن صدري وخفاقي ..
وبعد هذا رحلت ولا بقى الا بيتك المهجور ..
وألا ياكبرها لا من رحلت ومنزلك باقي ..
تذكّر يوم جيت من الحزن متضايق ومكسور ..
فرشتلك الضلوع وقلتلك ياسيد عشّاقي ..
خذ اضلوعي وبن فيها يسار الصدر بيت وسور ..
ترا مافيه قبلك من سكن صدري وخفّاقي ..