ياطول صبري على الدنيا وسود الليال ..
دنيا ياتركي عجزت اشوف معروفها ..
ألد عيني جنوب وحاجتي فالشمال ..
عيت تهيا وعيت تسمح ظروفها ..
والله وانا ابوك مافيني صبر واحتمال ..
أشوف عوج العرب ماكني اشوفها ..
ماهو ردى يوم اصد عن العلوم الهزال ..
لولا زحول العرب ماحشمت ضعوفها ..
ليتك وانا ابوك تفهمني على ايات حال ..
وتعرف مراسيلي لك وتفهم حروفها ..
في خاطري علم كنيته سنين طوال ..
مخفيه عن عاقل العالم وملقوفها ..
قضيت عمري طرب قدام لا البس عقال ..
واثر الليالي تدس السم في جوفها ..
في فية اللي مدرسني علوم الرجال ..
عودن معه مانقص مخباي مصروفها ..
عقب ماقفت ركابه واعلن الارتحال ..
نفسي عقب مارحل ماتبرد حسوفها ..
عساه في بارد الجنه وحسن المآل ..
روحن عسى الله يأمن فالحشر خوفها ..
كبرت وانا طموحاتي سوات الجبال ..
وتطوفني معظم الاحيان واطوفها ..
قبل احسب ان الليالي ماتبي وسع بال ..
وان المخاليق فيها تاصل شفوفها ..
وعقب دريت انها شمس قفاها الزوال ..
سردا تغر العرب باطراف نفنوفها ..
قنعت منها ورجواي بعزيز الجلال ..
ابا السلامه من الدنيا وصادوفها ..
للساعه اللي ليا حانت مافيها جدال ..
واحسرتي لاعصف بالروح عاصوفها ..
يالله رحمتك لاودعت قبر هيال ..
واصحابي من الغباين تصفق كفوفها ..
يالله رحمتك لاوديت قبرن هيال ..
وأصحابي من الغباين تصفق كفوفها ..
حنا ضيوف على الدنيا نشد الرحال ..
لولا المعازيب غير تودع ضيوفها ..
واطول صبري على الدنيا وسود الليال ..
دنيا ياتركي عجزت اشوف معروفها ..